ادلّـلي

ادلّلي .. وتغـلّي ..

خايل عليك الدلال ..

وخايل عليك التغـلّي ..

يجلّا الكلام السمح ..

فيك وين ما تجّلّي ..

تستاهلي ..

من قال ما تستاهلي ؟..

تستاهليني كلّي .

وكلّي عيش وملح ..

كلّي زها محبوب .

وكلّي سلام وصلح ..

كلّي عمار دروب .

وكلّي ..

غلا يغنيك ..

عن ودّ الودّايد .

كلّي ..

غلا يسلّيك ..

باحلام الوسايد ..

غير احلمي بيش ما اتريدي تحلمي ..

حلمك حقيقة تكون بين ايديك .

ولمّا بلا شيّ اتّغلّي بالزعل ..

حقك عليّ انجيك ..

يا انرضّيك .. يا انرضّيك .

غير بس لعيون المحبّة اجّـلّي ..

وادللي وتغـلّي ..

خايل عليك الدلال ..

وخايل عليك التّغـلّي ..

تستاهلي من قال ما تستاهلي ؟..

تستاهليني .. كلّي .

أنتي أبها

مرّة انتخيل فيك .. 

بين السحاب سحابة ..

لمّا امطرَت ..

لمّـيت في حجـري مطرها كلّه ..

وشكـّلت منه نهر .. مجراه منّي وفيّ ..

نمشوا أنا وانتي على ضفـّاته .

ومرّة انتخيل فيك .. 

بين الورود فراشة ..

تلثم خدود الورد .. وتداعب شفايفَّا ..

ولكل وردة أسرار .. ولكل سرّ حكاية ..

وايش صار .. وايش ما صار ؟ ..

بيناتكم سهراية .. ع الشوق مختلفة .

هذيك وردة شوق .. تحكيلك على شوقي ..

وهذيك وردة نابتة في عروقي ..

تسقيك من شهد الغلا ..

حنان ودفا وألفة .

ومرة انتخيّل فيك .. 

متقاسمة مع الشمس ..

كلّ النهار لها .. وساعة غروبها لِك ..

وروعة جمال الأصيل .. منِّك وفيك وبـِك ..

وكل مرّة انتخيّل .. ونقول : لا ، مش هِك ..

أنتي أجمل .. أنتي أكمل .. أنتي أبها ..

أنتي أوسع من خيالي ..

أنتي أسمى م المعاني ..

اللي قلم شعري كتبها .

قلنالها :

خلاص ابشري ..

هذا أوان خلاصِك .

ياليبيا ..

يا ارض الزهر والحنّة .

وحقّ مَن خلق فوحة عبير أنفاسك ..

من شي طيّب من نسيم الجنّة .

بنور الشهادة ..

نقشعوه ظلامِك .

بفرض الجهاد ..

انجاهدوا ظلاّمِك .

وكيف ما أيام زمان كانوا اجدادنا ..

ياليبيا لِك بالمحبّة والتفاني كنّا ..

ولمّا تكامل نصرنا .. وحقَّق الله آمالنا ..

بصر العدو كان بصرنا ..

وحال العدو كان حالنا ..

ماشيين في اتجاه .. عكس اتجاه وطننا .

ناسيين فضل الله .. نِعم الفضل والمِنّة ..

بالله لمتى ليبيا ...

تضحك ... وتبكي منّا ؟.

يااااارب ...

هذي ليبيا .. شافت قهر ما سدّها ..

دوبها اتصبّي ع القدم ..

يارب خوذ بيدّها ..

من نور نورك قيدها ..

من خير خيرك زيدها ..

من عزّ عزّك ياحفيظ احفظها ..

من حاسد بسوّ ايريدها ..

يا رب .. كِيد الكايدين ..

وودّ مَن فعلاً صحيح ايودّها ..

يارب دونك ليبيا ..

يارب ...

خوذ بيدّها .

حمامة سلم

حـامت مع نسوم السما ،،

وحطت احذاي اقريبة ،،

كانت حمامة سلم /

حسيتها شلال هادر م الغلا ،،

يروي الظما لحبيّبة ،،

وحسيتني في حلم /

وحسيت بمعالم دنيتي اتغيّر ،،

وحسيت ليلي اقصيّر ،،

والاقسام مني تعتذر ،،

عللي مضى من ظلم /

ناديتها بشوق الفيافي الحامية للفيّ

ناديتها بكل المعاني السامية اللي فيّ

في عمري رحيل حنين ،،

وفي عيونك مراسي /

في عيونك ملاذ أمين ،،

م الماضي القاسي /

الله ع الكون الوديع ،، اللي سكن في داري

الله ع القول البديع ،، اللي انسكب في اشعاري

الله ،،

ع الصبر الجميل ،،

اللي اقبل عندي جميل ،،

وبالمحبة ،، والعذوبة ،،

والغلا الدافي ختم مشواري /

أخيراً صبرت ونلت ،،

وكم كنت متمني الفرحة انطولها /

لواحة أمان وصلت ،،

رغم انعطافات الطريق وطولها ،،

أخيراً عليّ حن الزمان ،،

بظلها وجنانها /

وفازت العين الصابرة بحنانها ،،

وحطـّت بعد رحلة عنا مرحولها

قصيدة بيان الثوار

هذه القصيدة كتبتها وسجلتها قبل تحرير كامل الجبل الأخضر ..

الحمدلله الذي ألهمني إياها ، وأبّرَ قسمي .

جهـّز روحك آن أوانك .. جاك السيل أنت وأعوانك ..

حان عقابك .. حان حسابك ..

تدفع غالي حق الغالي ..

الوطن اللي مصـّيت ادماه .

الشعب الليبي راسه عالي ..

آهو ثار بعون الله ..

ايهدّم بنيانك واركانك ..

جهز روحك .

جهز روحك جنـّك جَيّ ..

خيل احفاد هذاك الشايب .

فعل احفاده ماهو دَيّ ..

مَدّ وضرب امسقـّم صايب .

كتايب جنهم, بعد شويّ ..

قالوا كانن فيه كتايب .

واللي منهم م الموت انجي ..

استسلم رَوَّح طايع تايب .

الشعب الليبي دَمّه حي ..

جنوب وشرق وغرب حبايب .

عليك اتحدوا خَيّ وخَيّ ..

التموا داروا فيك عطايب .

وفِيّ ايساند فيه وفِيّ ..

يقولوا ترابـِك ما هو سايب .

يَـمّ تراب ايعزّ عليّ ..

دون ترابـِك دَمـّي رايب .

الله واكبر والله قوي ..

ايواطي شانـَك ..

قادر , ويطفي نيرانك .. جهز روحك .

جهز روحك جاك الدور ..

وين ملاذك؟ كيف خلاصَك ؟.

جوك ابوادي وجوك احضور ..

السيل اقرب من حيطة ساسك .

ملـّوا م الظلم وم الجـَّور ..

من غدرَك , من خـُبث انفاسـَك .

تافه , دجـّال ومغرور ..

جرثومة أنت وأنجاسَك .

اكبود بغيض ودمّ اتفور ..

منفعلين ايريدوا راسَك .

اقسم بالله ومش زور ..

اقريـّب تشرب حنظل كاسَك .

شباب الثورة عطر ونور ..

ونار اتذوّب شدّة باسـّك .

فراسين جوارح , وصقور ..

والجرذان انت وحرّاسـّك .

إخسأ مذموم ومدحور ..

اخسرت رهانك ..

واخسرت حياتك وايمانك ..

جهز روحك .

تضامناً مع ثورة مصر

كـيلِك طفح يا مصر ..

من ظلم وظلام ومصّ دم وغصر ..

علله حليفِك نصر ..

وتطرد حمايم ثورتِك ..

بومة هذاك القصر .

آهو اختبار صلابتِك ..

علله تجني صابتِك ..

خلّي لهايب ثورتِك ..

ترعب ثعالب غابتِك .

زيدي .. عطاك الله صبر وقوّة ..

نين تكبري وما ريح غدر اتهزِّك .

بالعزم تغييرِك ايجي من جوَّا ..

غير اصبري بانت امواير عزِّك .

يا مصر موسى لاحَت ..

نهاية فراعينِك .

يا مصر ناصر فاحَت ..

ريحة رياحينِك .

يَمّ الهرم والسدّ .. يَمّ النهر ..

حريتِك عروس وغالية ..

ياغالية في المهر ..

لا تبخلي بمهر العروسة وابشري ..

بالعز طول الدهر .

عاقدين فيك آمالنا ..

وآمالنا في الله .

شورِك انشدّوا رحالنا ..

قاصدين وجه الله .

بارواحنا واموالنا ..

بسلاحنا ورجالنا ..

انصلوا صلاة الظهر ..

في ( أزهرِك ) يا مصر ..

وفي القدس باذن الله ..

انصلوا صلاة العصر .

رحلة فضل

هذه الملحمة كتبتها بمناسبة مهرجان فضل المبروك الذي أقامه منتدى أماسي البيضاء في الفترة من 13-16-7-2010م .

رحلة فضل

( 1 )

الأمّ :

الحـمـــد لله المحــمـــــود .. والله يلعنك يا الشيطان .

جيب جود يا جايب الجود .. وحـِنّ بونس يا الحنّان .

ايـونّـس اجـنـان الـورود .. ويسند ظهر بيه يطمان .

...

الحــمــد لله المحــــمـــود .. والله يلعنك يا ابليس .

جيب جود يا جايب الجود .. وتحنّن علي بونيس .

ايـونّـس اجــنـان الـورود .. ويكبر ويبقى عريس .

ونجــيبله نظــيف الخدود .. النفيس لابس النفيس .

الأبّ :

سبحان السميع المجيب .. العطّاي من غير مَنّه .

كنّيبه اسّا يستجيب .. للي حَسَن فيه ظنّه .

يا الله يا علم الغيب .. وعالم الأجل والأجنّة .

قادر تقوّي النصيب .. ومن فضلك بفضل انتهنّى .

( 2 )

هنا كانت محاريبه .. ايتبتّل في غلا مسّه

اشرب من نبعها طِيبه .. تنسّمها , تنفسّها

اقرب منها .. تحسّسها .. تلمسها

نبت فيده جبل أخضر

بعرعاره , وبطّومه , وخراريبه , وعصافيره

نبت فيده جبل أخضر

بماضيّه , وحكاويّه , وغناويّه وقذاذيره

( 3 )

لمس حب الجبل قلبه .. سكن حب الجبل داره

نشا فيه وسمع عنّه .. من اول لاخر اخباره

حكوله عن جهاد الجبل .. وعن ما دار مختاره

المختار اللي ما استسلم ولا قصّر في مشواره

على دينه- على عرضه – على وطنه وعلى دياره

جبل ثاني على سفوح الجبل قاوم استعماره

بعزيمة ناسه قاومهم وبادواره وباصراره

وحكوله عن حياة النجع , ترحاله .. استقراره

وعلى ما ايصير في بيوته .. وما قالوه شعَّاره

على اجواده,وفرسانه,وشموخ وحكمة اكباره

وعلى صوب الخليل اللي شهير بجرحه وبناره

وسهاريّه , وغناويّه , وحجاويّه , وأسراره

(4)

هذا كله سمع عنّه..

هذا كله روى منّه..

هذا كله بدا يفجر

ينابيعه الرقراقة ..

هذا كله بدا يثري ..

قريحة شعر دفاقة ..

بدا يشكـّل مسارب للشعر جمّة ..

ابقي همّه ..

قضايا الوطن .. والأمّة ..

وحكايات الغلا.. ولمّا ..

كتب غنّى على أول غلا عنده ..

غلا أمّه .

( يا غالية يَمّ الغلا يا يام ..

يا طيّبة والطيب فيك سجيّة .

منك تعلمت الوفا يا يام ..

ومنك عشقت الوطن والحرية ..

كنتي تقوليلي يا اوليدي :

ما تواطي راسك للياس ..

كنتي تقوليلي يا اوليدي :

صون العرض ..

وحبّ الأرض .. وحبّ النّاس ).

وحَب الأرض ..

وصان العرض ..

وحَبّ الناس ..

وما واطى راسه للياس .

وسخّر للوَطن فنّه ..

على ربوع الجبل غنّى ..

وتزود م الوفاء زاده ..

ورحل رحلة نغم منه ..

من ادنى لآخر بلاده ..

على ربوع الوطن غنّى ..

على تاريخه وامجاده ..

وعلى سهوله .. وعلى بَحره ..

على كل المدن غنّى ..

وعلى الارياف والصحرا .

(5)

وعرف – رحمة الله عليه –

أصول العشرة والصحبة .

كتب للصاحب يوصيّه ..

على الصاحب ،وينصحبه..

رفق بالود ينصحبه .. مع الصاحب.

( كان غاب عنك سال وانشد عنه ..

وان جاك زاير قول مـِيْة مراحب ).

وياما غنّى عالصوب وفرحه وجراحه ..

وقال على احوال العـَشّاقة .

على قلوب هنيّة مرتاحة ..

وع الّلي هدّت حيله اشواقه .

( تقول نعرفك من قبل مانلاقيك ياعيونها ..

أنا شايفك في حلم ومناجيك يا عيونها )

( ومانك للوصاة انوصيّك ..

ياصاحب وعاشم فيك )

( ويامحبوب طول عمرنا نا وانت يا محبوب ..

يا محبوب طول عمرنا نبقوا رفاقه صوب )

( ونوارة تحلم بالغية ..

نوارة في وان عشية )

وتهادي في وسط النوار)

و(مطلوق سراحك يا طوير)

و(كذا حط الشاهي ع النار )

اجنان اشعار ..

اجنان اشعار ..

يفوح اعطار ..

يفوح محبة .. يفوح افكار .

ايفوح اشعار ..

اشعاره .. خلدت اسمه ..

ابقي صوت الجبل صوته .

اشعاره .. خلدت اسمه ..

وحياته اجّاوزت موته ..

حياته اجّاوزت موته .

عارفـَك

تدّعـيلي انِّي حـبيبـَك ..
وانَّ عـندَك شـوق ذارف ! .
يا خِي بطــّل أكاذيبَك ..
يا خِي بطــّل هـ الذوارف ..
أنا عارف ألاعـيبـَك ..
وانتَ عـارف انِّي عارف .
عارفــَك ..
أمتى اتـّهرَّب من حبيبَك ..
واتــّنصَّـل .
عارفــَك ..
أمتى اتـّقرَّب من حبيبَك ..
واتـّوســَّل .
عُقـدة النقص اللي عندَك ..
زيَّفـَت فيك الشعور .
خلـَّت اسمَى غاية عندَك .
تلفـت انظار الحضور .
ولمَّا تسمَع كلمة حلوة ..
أي حدّ يقولها لَك .
من بعَد كـذبة شموخَـك ..
لمَّا تسمعها اتــّهالَك .
واتـّهــرَّب ..
م الِّلي كان اسمه حبيبَك ..
واتـّملــّل .
واتـّقرَّب ..
م الــّلي سمـيته حـبيبَك ..
واتـّذلــّل .
واتـّنازل أكثر اكثر ..
واتـّعـثـّر ..
وتنتهي بيك المســيرة ..
لكذبة الحب الكــبيرة .
والغريبة والعجيبة ..
اتجيني ودموعـَك ذوارف ..
تدّعيلي انِّي حبيبَك .
والِّلي أغرَب م الغريبة ..
أنِّي عارف انـَّك عارف ..
أنِّي عارف ألاعـــيبَك .
يا خِي بطــّل هـ الذّوارف ..
يا خِي بـطّـل أكـاذيبَك .

لا ملامة

لا ملامة ..
مدام انـَّك جيتني ..
جيّة حمامة .
مدام انـَّك جيت ..
مسبوق بندامة .
لا ملامة .
لا ملامة امسح دموعَك ..
واحمد الله ع السّلامة .
يا اللِّي من ساعة رُجوعَك ..
غادرَت قلبي غمامة .
لا ملامة .
لا ملامة ع الغياب ..

وع الفجيعة ..
لا ملامة ع العذاب ..

وع الوجيعة ..
مدام انَّك جيت بطوعَك ..
يا اللِّي من ساعة رُجوعَك ..
غابَت الدّمعة الحزينة ..
وانتهَت كلمة حسايف .
وعادَت البسمة الدّفينة ..
ترتسم فوق الشّفايف ..
واحتفل قلبي بغرامة .
لا ملامة .
لا ملامة ..
جـيّــتــَك تعني حنينـَك .
لاملامة ..
يا اللِّي من بهرة جبينك ..
ابتدا الليل ايتناهى ..
شايل احزانه امعدِّي .
واصبح الصبح ايتباهى ..
أعلن الصبح التّحدِّي ..
وأعلن الليل انهزامه .
لا ملامة .

عشّ الدّفا

جـرّبت ..
كم قصّة غـلا ..
وكم شـمعة غـلا ضوَّيت ..
وجـرّبت ..
كم لوعة جـفا ..
وكم شـمعة غـلا طفـَّيت ..
انعدِّي وكبير رجاي ..
ونعـاود بخلو ايدَيّ .
مرَّة الحـقّ معـاي ..
و مرَّة الحـقّ عليّ ..
و ياما بلا همس الغلا غفـَّيت .
كم من مراسـيل الغلا ..
دزَّيت ..
وكم من مراسيل الغلا ..
ردَّيت .
وكم عين ذوَّبها الحزن ..
فرَّحتـها ..
وكم عين عاصي دمعها ..
بكَّيت .
وآخر طوافي في الغلا ..
على عيونها ..
رسَّيت .
حامَـن حمـاماتي ..
على عـشّ الدّفا وفاتنـّه ..
ما يندرَن باقسامهن .
ووين حان حينَه ..
عاودَن عشّ الدّفا لاقنـّه ..
اِيمنِّي بجميل ايَّامهن .
هذي تصاريف القدَر ..
هذي تصاريفه .
يسقيك من كاس الكدَر ..
ويردّ من كيفه ..
ايبدّل جفاه مودّة ..
ويسقيك الهنا ..
من يدّه ..
وتروى هناء ..
كيف ما بهمّ ارويت .

محبوبنا

وصلتوا ..
مشارف صوبنا ..
ولو كان زدتوا اشويّ ..
راكم ..
وصـلتوا قلوبنا ..
ولو كان طلتوا قلوبنا ..
راكم عـرفتوا ليش ..
غير الحبايب كلّهم محبوبنا .
محبوبنا اللِّي وين ..
ما نادى الـغلا لبَّا ..
بعزومنا واقف ..
على صخرة غلا صلبة ..
و بانفاسنا مدَّفي ..
و وين ما ايغفِّي .. ايغفِّي ..
مطَّـامن على قـلبه ..
من غضبنا ومن جفانا ..
وم الغموض وم العناء ..
مطَّامن على قلبه .
مـحـبوبنا يقـرانا ..
مـن ألفـنَا لليـاء ..
ما عـندنا امـخبَّا .
محـبوبنا ..
يدلَّل عـلينا بغَـايته ..
وينال ما ايتـمـنَّى .
ويحكي لنديَّات الورود حكايته ..
وهن ع الغلا ايهنـَّنه .
محبوبنا انشيلوه ..
فوق من كفوف الرَّاحة ..
و نقسوا عليه يا دوبنا .
لولا الزَّعَـل ..
ما ايزيد فيه سـماحة ..
ما انزعّـلوا محبوبنا .
هذا قـَدْر مـحبوبنا ..
اللِّي قبل بيه اكبرتوا .
كثير الطّمع في صوبنا ..
لو كان غير صبرتوا ..
غيركم ..
حاول عَـبَث يلفت نظرنا وانتوا ..
وصلتوا مشارف صوبنا ..
ولو كـان زدّتوا اشويّ ..
راكم وصـلتوا قـلوبنا .