عيون أمّي

إلى أمّي ، وإلى كل الأمهات اللواتي ولِدن قبلها وسيولَدنَ بعدها .

والدتي مع ابنتي حياء .

عيون امّي ..
اتونّس لمّة العيلة ..
ونفس أمّي .. ايدفّيها .
ورغيف أمِّي ..
وحديث أمِّي ..
على كانون شاهيها ..
يساوي لذّة الدنيا ..
وما فيها .
وصوت أمِّي ..
ودُعاء أمِّي ..
ندا ينساب م الجنّة .
وجبين أمِّي ..
امراية للوطَن تعكس ..
حكاوي عاطرَة عنَّه .
و نفايلها ..
وجدايلها ..
وهذيك الرُّوح ..
والبنَّة .
وطَن ثاني ..
وطَن حاني ..
وطَن يبخَل على روحه ..
وطَن ينزف على ايديها .
وقلب أمِّي ..
وحنان أمِّي ..
بحر غُفران ما يغضَب ..
بحر غُفران ما ينضَب ..
بحر يغسل خَطايانا ..
ايطهّرنا ..
ايجدّد في حنايانا ..
طُفولتنا ..
وأصالتنا ..
بحكاويها ..
عن الماضي ..
عن الأخلاق ..
و المبدا ..
وعن النّجع ..
وعن البيت .. ..
وعن المسدَا ..
وعن الأرض ..
وعن الدّم اللِّي راويها .
عـيون أمِّي .. ونفَـس أمِّي ..
وحديث أمِّي .. وصوت أمِّي ..
ودُعـاء أمِّي .. و جبين أمِّي ..
وقـلب أمِّي .. و حنان أمِّي ..

وسُموّ امّي .. وكلّ امّي ..

بجلالتّا .. وفخامتّا..

وسعادتّا.. ومعاليها .
وطَن ثاني ..
وطَن حاني ..
وطَن يستوطن افكاري ..
وشراييني ..
ودواويني .. ومعانيها .

الحلم الوديع الطفل

شالَت معاي عيونها ..

شالَت مواجع دامية .. ردَّت أنفاس وروح .

رَيت الغلا في عيونها ..

ودّ وعواطف حامية .. صامت قريب يبوح .

مدَّيت يدّي ليدها ..

ابتسمَت خجولة وسلّمَت .

بهمس الغلا كلّمتها ..

بهمس الغـرام تكلّمَت .

كلمة غلا ، بيها أهمست ..

هزَّت مشاعر .. حرّكَت وجدان .

مدَّت أيديها والمسَتْ ..

بُور وجدايب .. نبّتت ريحـان .

حسّيت بعيون الغلا .. وقـلوب العاشقين ..

شواهد بداية صوبنا .

حسّيت بعيون الغلا .. ودعوات العاشقين ..

اتبارك خطاوي دروبنا .

تبسَّـمـلنا مكـتوبنا ..

صِفيَت مشارب صوبنا .

الحلم الوديع الطّفل ..

بـخميسته وقرينه .. يدَّودَش يدينا تقوده .

الحلم الوديع الطّفل ..

شبّ وترعرع فينا .. اشتدّ وتقَاوى عوده .

وسرنا علي درب الغلا ..

بخطوة ثبات وعزّ ..
وقـلوب ما تـهـتزّ ..
مـن ريح الحـَسَـد .. والحاسدين اكثار .
وصار الغـلا بيناتنا ..
قَدر ، ودلال ، وودّ ..

وبساط رحـمة امـتدّ ..منقـوش بالنّوَّار .

بغداد

إلى الصديق : عبدالحفيظ أبو غرارة .

الشاعر : عبدالسلام الحجازي .

بغداااااد :

يا ريحـة العزّ الغابر .. من رُفاة أجدادي .

بغداد : يا جرح دامي وغاير .. في صميم فؤادي .

وحقّ الكرامة الضايعة المهدورة ..

وحقّ السيوف البايدة المكسورة ..

سامعينـِّك ..

بعـزِّك الّلي مذبوح ..

بصوتِك الّلي مبحوح .. فينا اتنادي .

سامعينك .. وشايفينك ..

وبيعة الزاهد يا عروس خليجنا ..بايعينّك ..

يا جرح طيّ فؤادي ..

لا تندهي لا تنادي ..

ولا اتفزّعي ما يفزعولِك موتى ..

لا تصرخي ما يسمعولِك صمّ ..

لا تحلمي .. بفزعة الخي لخوته ..

احنا خوت لكن ما انجلّوا همّ .

يا جرح طيّ فؤادي ..

لا تندهي ولا تنادي ..

ولا تصرخي ، راه صرختِك .. صرخة ألم في وادي .

كم هول شفتي في الزمان وهول ..

م الفرس والتتار والمغول ..

كم قـتّلوا .. كم شـرّدوا ..

كم خـرّبوا في أرضنا .

وآآهم كلاب الغرب ..فيك ينهشوا يا عرضنا ..

ونحنا كما نحنا ..

ملوك وجاه ..

كل شي بدَّلناه ..

الدمّ غير الدمّ ..

والدين غير الدّين ..

والله – عفو الله – غير الله .

سُوَّاح ف أرض الكفر بعقالاتنا ..

بين المراقص والملاهي ..

زاهية ليلاتنا ..

بقصورنا ..بعطورنا ..

بساعات راما ..طيبات اوقاتنا .
بغداااااد :يا عاصمة الاجداد ..

يا امكبّلة باصفاد ..

لا تنشدي وين العرب ..عمر العرب ما حرّرولِك دار .

عمر العرب ما ياخذولِِك ثار .

لا تنشدي وين العرب ..عزّ العرب مفقود ..

غارقين في بحور الطرب ..هايمين في هوليود ..

رقص وليالي حمره ..

قمار وضَياع وخمره ..

طفيَت هذيك الجمرة ..

الّلي بنورها وبنارها .. وصلنا حدود الصين ..

فتحنا المشارق والمغارب ..بالله معتصمين ..

بعدّة وعدد وقلوب مؤمنين ..

بعون ونجَدْ ورجال متّحدين ..

بأحدٍ أحَدْ ..كسرنا عدو الدين ..

وبيها اجمَّع شملنا ..وتشهدلنا حطّين .

طفيَت هذيك الجمرة ..
بردَت هذيك النار ..
انسينا صليل سيوفنا ..
ابقي سيفنا مزمار .

بغداااااد :
يا جرح جوَّا الرّوح ..
يا عرضنا المسـفوح ..
وحقّ الكرامة الضايعة المهزومة .
وحقّ الأنوف الطايعة المرغومة ..
لِك نفزعوا بالعود والجيتار ..
لِك نفزعوا بالدفّ والمزمار..
ما سَوّ , فينا اتظنّي ..
اطّامني وتهنّي ..
ما دام فينا اصوات ..
بالصوت الحنون اتغنّي ..
ع الطبل والأوتار ..
وتقولْ لِّك بلسان أهل النار :
وحقّ دينّا البترول ..
وحقّ ربنّا الدولار ..
ما نرتضولِك ذلّ ..
ولا نرتضولِك عار ..
جايينِّك ..
مليون مطرب يمتطي صهوة جواد الفنّ .
مليون ماجن مـُنتشي يذكّرِك ويحـنّ ..
ويكتب عليك اشعار ..
جايينِّك باصرار ..
نين نمسحولِك دمعتِك ..
نين ناخذولِك ثار ..
نين نوقدولِك شمعتِك ..
نين نرفعوا الحصار .

الرحّال

معاي اصوّري ..

رحّال فـ ارض الله ..

يطوي فيافي شاسعة ..

امتدَّت علي مرمى البصر ..

لا ولف ، لا ونّاس .

يعاني الظّما ، وقلّ الرّجا ..

زاده قـليل .

ذاهب علي درب النّجا ..

ضلّ السّبيل .

يحلم بواحات ونخيل ..

والظلّ الظّليل ..

يحلم يلاقي قافلة ..

يلاقي دليل .

حاير وقف مكـتوف ..
عطشان خاوي الجّوف ..
ثقلَت عليه اخطاه .
سجد ع الرّمال بخوف ..
نادى ندا مـلهـوف ..
الغـوث يـا ألله .
تحامَل علي نفسه وقف ..
ولـمّا شرَف ..
شاف النخيل وظلّه ..
وشاف المياه الصّافية ..
وشاف البلح يدّللا .
تحايا الأمل في نفسه ..
نادى بأعلى صوت : وداعاً يا عذاب ..
آ هي المياه الصّافية ..
آ هو البلح والقوت .
آ هي الشّفا والعافية ..
آ هو النّجا م الموت .
وداعاً يا عذاب .
رحلة صعيبة وانتهت ..
وبكلّ قوّة باقية ..
من جسمه بقَت .
ركض في اتّجاه الواحة ..
الواحة تلاشَت .. واختفت ..
كانت سراب .
يا نويرتي الرّحـال ..
ما شاف الهنا .
الّلي جرّبه الرّحال ..
جـرَّبـته أنا .
كم غاب عنِّي الفكر ..
وغمَّضت عيني .. ما شافَت خطاك .
شكراً جزيل الشُّكر ..
لاجل صدمتيني .. بغدرك وقلّ وفاك .
عاد الفكر للفكر ..
وفتّحَت عيني .. ماعاد ترضى بغلاك .

يا حلم ما ينطال

يا حلم .. ما ينطال ..
يا فرح ..
ما خلّف امغير امواجع .
يا سرّ .. ما ينقال ..
يا نور ..
بقدوم الظّـلام تراجع .
أنعدِّي عذاب ..
أنعاود عذاب ..
ونوقف ..
أنشوف العذاب ..
بعينه .
يميني سراب ..
و يساري سراب ..
ونظرتي ..
جوّا السّراب ..
دفينه ..
هـ العين ..
تبكي ع الحبيب الرّاحل .
والقلب ..
عدّا فـ الاحزان مراحل .
والحال ..
يعـلم الله بالحال ..
يا حلم ما ينطال .
يا بسمتي الِّلي حارَت ..

بين ترتسم بين تـختفي وتغيّب .
يا فرحتي الِّلي صارَت ..

مدّ وجَزر , ملقى ورحيل اقريّب .
يا ريح مـن قـلّ الرّجا ..
هـبَّت ا تعـاند فـيّ .
يا أمـل مـن نفسي بدا ..
يسرَّب شوي , شوي .
محتاج حاجة ماسّة ..

ليَدّ النّجا تسـعفني .
محتاج حاجة ماسّة ..

لنسمة رجا تلاطفني .
أتبدّل الحال بحال .
يا حلم .. ما ينطال .

خطية عمري

يمكن انكون اخطِيت ..
في عمري خطايا شتَّى .
ويمكن انكون حسَّيت ..
بإحساس الألَم ساعتَّا .
وتبقى خطايا عابرة ..
وتمرّ .
وتمرّ .. ما تترك أثَر .
لكن خطيّة عمري ..
بيدي مسَكت الجمر .. نحسابه دفا .
لكن خطيّة عمري ..
لجلِك فنَيت العمر .. نحسابه وفا .

ما كان النّدَم..
يعرف طريق لقلبي ..
واليوم .. حسّيت بندَم ..
مـرّ النّـدم ثاريته .
ولا كان الأمل ..
يهجر خطاوي دربي ..
واليوم .. ودَّعني الأمل ..
وَهْم وسراب ألقيته .
حسّيت ..
بالشّمس تغرب ..
في عزّ النهار .
حسَّيت ..
بالفرح يهرب ..
ويلوذ بفرار .
ألقيتِك .. خطاوي أتوخّر ..
ألقيتِك .. ندى وتبخَّـر ..
ألقيتِك ..
مشاعر عابثة ..
أتغالي علي راحتَّا ..
وتهجر علي راحتَّا .

نداء الأمل

تحايا وردنا العاطر ..

على ضفة أمانينا ..

وسكن فينا ..

أمل صادق ايمنّينا ..

بحياة أجمل من اللي في غناوينا ..

وتمشّينا على شط الغلا ترسم ..
خطاوينا .. خطاوينا ..

وتصوّرنا الأثر يبقى ..

دليل لكل مَن ينشد ..

على زهو الغلا وينا .

وتصوّرنا الأثر يبقى ..

دليل لكل مَن يعشق ..
وتايه عن مراسينا ..

وتفاجينا ..
تلاشى ما تصوّرنا .. وظنينا .

طغى موج الحسد غطى موانينا ..

طغى موج الحسد غطى ..

شوارعنا ..

ومداينّا .. وموانينا .

تخاصمنا .. وتصالحنا ..

وتواسينا .

وتخاصمنا .. وتصالحنا ..

وتراضينا ..

وتخاصمنا وتخاصمنا ..

وملّينا ..

وتخلينا ..

على أجمل مشاعرنا .. وأمانينا ..

ذبل ورد الغلا العاطر على يدينا ..

وسكن فينا ..

أمل ثاني ايمنّينا ..

بحياة أجمل من اللي ..

في حكاوينا .

مش لأنـّي ...

مش لأنِّي ..

نعرف انسامح ..

ونعذر ..

ونتغاضى ..

أو لأنِّي ..

بكلمة الحُب انتراضى ..

يعني أنِّي ..

نرتدي ثوب المذلَّة ..

وما انتخلاّ ..

ع الحبيب ..

اللَّي ايتمادى في التَّجنِّي .

نفرش ابساط المودّة ..

ونفترض حسن النّوايا .

ونلتمس عذر لحبيبي .

ونغفر اصغار السّوايا ..

لاجل انِّي ..

نعرف الصّوب بأُصُولَه ..

والغلا هجر ووصال .

و سيّة الغالي الخجولة ..

عندي من بعض الدّلال .

الزّعَل عندي دلال .

والغضَب عندي دلال ..

والدّلال ..

ملح المودَّة ..

والمودّة ..

هي أنِّي ..

نعرف انسامح ..

ونعذر ..

ونتغاضى .

المودّة..

هي أنِّي ..

بكلمة الحب انتراضى .

ولمَّا نشعر بالمهانة ..
والغلا يصبح مسبَّة ..
ينتقض عقد المتانة ..
في المحبّة ..
حبَّة حبَّة ..
ونلقى أنِّي ..
ما انتهاون لا انتعاطَف ..
لا انتوانا ع الكفا ..
في غضب يَمّ العواطف ..
نلتمس برّ الجفا ..
الزعَل .. عندي جفا ..
والغضَب عندي جفا ..
والجّفا ..

طَوع الكرامة ..
والكرامة ..

هي أنِّي ..
نرفض الحب بمذلّة ..
وانتخلاّ ..
ع الحبيب ..
اللِّي ايتمادى في التَّجنِّي .

وصفوك

وصفوك ..

قالوا شبيهة للقمر ..

ظلموك ..

وين القمر من زِينِك .

وين العواطر .. من عبير انفاسِك .

وين الخمايل .. من جميل الباسِك .

حاشاك ..

مانِك كيفهن ..

هن وين .. وانتي وينِك .

يا الّلي انفاسِــك .. ع العواطر ســادَت .
ويا الّلي عيونِك .. في السّواد تـمادت .
منِّك خذَت ..

كلّ الورود شذاها .
والّليل ينهل .. من ســـــــواد عيونِك .

يا الّلي اوصافِك .. ع السّماحة زادت ..
في وصـــفـها .. كلّ القصـايد كادَت ..
عندِك وصايف ..

كلّ مَن راعـاها ..

يصبح سليب العقل .. طالب عونِك .

عيد ميلادك

حنّ الزّمان وجاك ..

عاود لميعادِك ..

يوقد مع شموع الغلا ..

شـمعة زيادة .

تمنّيت نا ويّاك ..
في عيد ميلادِك ..
شمعة محبّة بينَّا وقَّادة .
والجو هادي ..
والسّكون أمخيّم ..
والكون عنّا ملتهي ..
وأنتي .. وأنا ..
وما نشتهي .
همس وحديث مشاعر ..
بأشواقها اتّودَّد ..
قَـول وخواطر شاعر ..
يحكيبها اتّردَّد ..
علي لسان كلّ النّاس ..
مليون ليلة وليلة .
والنَّاس بيها يطـرَبوا .
مَن كيفنا في النّاس ..
مجنون ليلى ، وليلى ؟ ..
كيف صوبنا ما جرّبوا .
أنتي وأنا ..
نهر وضفايف ..
لا .. يمكن النهر إ يجـفّ .
وما ينحدر ع الضّـفّة .
أنتي وأنا ..
بسمة وشفايف ..
لا .. يمكن البسمة اتكفّ ..
و ما ترتسم ع الشـّفّة .
أنتي وأنا ..

شَيّ ثاني ..
أنجرب انحاول نوصفه ..
وتكيدني المعاني .
يا عشق ..
ينزف عشق ..
ينزف حنان وشوق ..
يفيض بعواطف دافية ..
دفَّاقة ..
اتمدّ الخواطر بالدّفا .
يرسم جداول صافية ..
رقراقة ..
تنساب في اجنان الغلا .
يزهر جدب .. ينشر شذى ..
أتغرد بلابل بالغنا صدَّاحة ..
وقلوبنا اتميللها .
وتكبر اجنانات الغلا ..
وتبقى الجّداول واحة ..
ومن فوقها اتظلّلها ..
سحابة غلا ورديّة ..
مليانة دفا وحنيّة ..
تمطر حنان وشوق ..
يا عشق ..

ينزف عشق ..
ينزف عشق ..

ينزف حنان وشوق .

الرسالة

من قلب حايس .. ما عرف طعم السّكينة .

من وجه عابس .. يـبتسم بسمة حزينة .

من روح ..

في حضن الرّجا .. نامت وتحلم بيكم .

ويدين ..

ما تـحسّ بدفا .. إلاّ بضمّها ليديكم .

لأحـباب كانوا هنا ..

وغابوا عليّ من سنة ..

حايَوا تباريح الغلا الدّفينة .

بعد التحيّة والمحبّة والاشواق الحارّة ..

بعد التّحيّة والمحبّة والأماني السّارّة ..

يا هل ترى انتوا كيفنا .. امرايفين ؟.

وين الحديث يجيبكم ..

تنده العين دموعها ..

إيجَـن سايلات ارياف ؟.

يا هل ترى انتوا كيفنا ..خايفين ؟.

من عين الحسود تصيبكم ..

وتعطش نواوير الغلا ..

تذبل تصيف اصياف ؟ .

يا هل ترى المشوار ..

يتمّ بزهـا رفقـتكم ؟ .

والَّلا المقـدّر صار ..

وعين الحسد صابتكم ؟ .

وغيابي علي ناظركم ..

غيّبني علي خاطركم ..

ودرتوا جـديد اولاف ؟ .

ردُّوا عليّ .. كبدي عـليكم ذايبة .

ردُّوا عليّ .. عنّي الحقيقـة غايبة .

نين تبعـثوا مرسـالكم ..

يوصف جديد احوالكم ..

سوى وصل والّلا هجر ..

بسّ الـمهـم يقـول .

غير ابعـثوا مرسالكم ..

واحكوا الّلي في بالكم ..

عندي رحابة صدر ..

وآخر كلامي نقول :

امرايف ..

وانكمّل في ليلي ..

نمسح في دمعة اتجي دمعة .

امرايف ..

وانكمّل في ليلي ..

نوقـد في شمعة من شمعة .

رقصة الغيطة

ابني سالم - أصغر مشجع لفريق الأخضر - وهو يرقص على إيقاع الغيطة التي تتغنى بالأخضر . وهي مقطع من ملحمة حكاوي الجبل التي أنتجها نادي الأخضر بمناسبة عيده الخمسين .

نور ونواوير

نور .. ونواوير ..
و مـشـاعر حـافلة بإحـساس عــذب ودافـي ..

وفَيّ .. وشذى .. وراحة ..
ونسـايم عـاطرة .. بوجـودكم يااولافي ..

بوجـودكم .. وسـع الفـضا ما يسـدّني ..

بوجـودكم .. دافـع خفـيّ يشـدّني ..

لعــيونكم ..

لا نفـاسـكم ..

لاحسـاسكم .. برياف فـوق اريافي .

لو تعـلمـوا ..

فـرحـان بيكـم فـرح ..

نخـاف نوصـفـه ما نَقـدَر .

غـير تسـلمـوا ..

يا ضيّ شـمـس الصبح ..

مـن كـلّ شـيّ يكـدّر .

حـسـيبي الله , ويشـهـد عليّ ..

هايمبكم ، هايمبكم ، هايمبكم .

لا ا نروق لا ا يهــوّن عـليّ

هـمّي ، إلاّ ذِكْـرِي لكـم .

في صحـوتي ..

في غـفـوتي..

في خاطـري .. في دَيّ جهـر وخافـي .

وين تخـطـروا ..
انحـسّ بونس في وحـدتي ..
وهـاجـس الغـربة يزول .
ووين تحـضـروا ..
يا كلّ شـيّ في دنيتي ..
يـحلى الغـزل والقـول .
بوجـودكم في داخـلي ..
من داخلي .. نبض وتحـايا بيكـم .
بسـيرة غـلاكـم ما اخـلي ..
لا ما اخـلي .. مـيعـاد مـن طـاريكـم .
أنتوا الأمــان ..
أنتوا الحــنان ..
أنتوا الزّمــان .. الّلي ربيعــه لافـي .

الشمــس

كيف ما الشّمس وقت الشّروق اتبان ..

تشـرق علىّ طـلاّتك ..

انـحسّ بدفا يا احبيّبة .. يملا جوانب داري .

ولـمّا الشّمس في غروبها تلبس قناع ألوان ..
سبحان كيف وجناتك ..
أنحسك احذاي اقريّبة .. ونهمسلها بأشعاري .

كيف ما الشّمس ع الكون ..
تشرق حنونة وداااافية ..
أنتي شمس كوني .. الدّافية الحنونة .
عندي غلا مصيون ..
عندي محبّة صافية ..
وعندي عواطف .. ساخنة مجـنونة .
عطشان ..
يا نبع الغلا روّيني ..
م الودّ قطرة ، قطرة ..
اتهوّن الشّوق عليّ .
وبردان ..
يا شمس الدّفا دفّيني ..
نا عاشقك بالفطرة ..
عشق النّظر للضّي .

كيف ما الشمس في الكون ..
أنتي الشّـمس فـي كوني .
وانتي ..
سهاري خاطري ..
.. لعيوني ..
انتي عيون دليلي ..
لمّا الدّليل يسير.
وانتي ملاذ رحيلي ..
لمّا الدّليل يحير.
ومازلت نهمس للشّمس بأسراري ..
مازلت نروي في كلام أشـعاري ..
ردّت الشّمس وقالت :
شـوّقتني للعشق ..
يا ريت لي معشوق .. احنيّن كما حنِّيتَك .
آن الأوان نودّعك ..
وعلي الله بكرة ..
نلتقوا ع الشّوق .. تحكيلي علي غاليتك .

ونامت علي بساط الأُفق ..
تـحلم برحلة أمس ..
نامت وغطّاها الشّـفق ..
نوم الهنا ياشمس ..
نوم الهنا .. يا شمس ..

نوم الهنا ...

ياشمس.

مهد الغلا

مازال في مهد الغلا .. مازال صافي غديره .
دافي , حنون , أمليكة .. طيِّب نقيّ السّريرة .
مازال هادي ..
ما عرَف .. معنى الخديعة .
مازال رايق ..
يبتسـم .. بسمة وديعة .
مسكين قلبي في الغلا .. مـاله تـجارب .
دوبه ايخطِّي , والغلا .. دروب ومسارب .
يا نويرتي قلبي الوديع .. يا ما يريد يشوف .
نلقانِّي خايف يضيع .. إيحسّ بمرار وخوف .

مش كان رايق ياغلا .. روقة أفكار ولِيد ؟.
ليش يا غلا جيته ؟ .
بالشّوق جيته ياغلا .. والدّمع والتنهيد ..
بالشوق ما ودّيته .




المسكين آهو بالغلا فارح ..
ومش حاسب اجروحه وهمَّه .
يدَّودَش علي بساط الغلا ..
وليّ يبتسم بسمة العيّل لأمّه .

يدّي عـلى كبدي ..
وكبدي علي قلبي ..

وقلبي حزم أمره .. ولا علي باله .
صوت الغلا الوردي ..
ينـاديه ويلبـّي ..

شايف سنا جمره .. دافي ايتهاياله .

مرّة انتخـيَّل فيه ..
يصول في الغَلا ويجول ..
واقف علي اقـدامه .. بالفرح يوعدني .
ومرَّة انخاف عليه ..
من جرح الغلا ونقول :
يا الله السّـلامـة .. يا ربّ ساعدني .

هذا أوّل الهديل : قصيدة ( هذا أنا )

في الصّوب ..
ما نعرف سطير الجّرح .
انرافق بطِيب وطرح ..
ونفارق بطِيب وطرح ..
و انردّ الكفا ..
بقولة : الله يسامحَك ..
ونعلن حضور الفرح .
في الصّوب ما نعرف سطير افكار ..
ولا بالسّوايا انودّ فللِّي ايودّني .
في الصّوب مرسالي كلام اشعار ..
تاخذني المحـبّة ..والمحبّة اتردّني ..
طيّب .. وقلبي طيّب ..
امدلَّل وخايب في الغلا ..
و انخيّب ..
و انعدّ في عيون الحبيب ..
اللِّي في غيابي ايعدّني .
في الصّوب ما نعرف زعَل ..
لا , للزَّعَل ..
نرضى بقضا الاقسام .
في الصّوب قنديلي غزَل ..
وعندي الغَزَل ..
موج , وهديل حمام .
لا انرافق اللِّي يفارقني ..
ولا انفارق اللِّي يرافقني ..
ولا انذلّ ..
لا ننذلّ ..
لا انلوم .. لا نلتام .
هذا أنا ..
وهذي مداين صوبي ..
نوَّار في نوَّار كلّ دروبي ..
وطِيب ..ودفا .. وسلام ..
وعفَّة ودلال .. ومَرَح ..
في الصّوب ما نعرف سطير الجَّرح .

آنستوني

مرحباً بضيوفي الكرام .. هذه مدونتي التي اخترت لها من الأسماء هذا الاسم (هديل) .. أرجو أن تكون إضافة جديرة بكم .. وأن تكون براحاً للتواصل .